من طرف القفة :زهير هاشم
متابعات الخبــــر الســــــوداني
المزيد من المشاركات
قصتين ما بنساهن واحده حكاها لينا جدي زمان عن ود (ابشرا) الشرد بالدلو المخروم من ساحه القتال والتانيه سمعناها اليوم في صباح الدبيبات لما واحد من الدعامة شال (الكفتيره) حقت الشاي وقام جاري في نص الهجمه و(طق) (الكوراك) الصياد جاكم مشتركة جاتكم.. القصة دي براها بتختصر ليك الفرق بين رجال الميدان وبين ناس التصوير والميديا الكاذبه… قال ليك صلاة الصبح الدعامه مولعين نار الشاي زي ما تكون الدنيا امان ومافي حرب وهم ما كانوا عارفين انو في متحرك اسمو الشهيد الصياد داير يصطاد الحالمين بملك السودان والواهمين انو المواطن السوداني بيقبل بالذل و الهمجيه…. نور خفيف بان في طرف السما قالوا ده فزع مرسلو ليهم (طاحونة) بعد لحظات سمعوا السلاح يطقطق .. جري.. صياح.. ارتباك.. قال ليك واحد شايل الكفتيره والتاني شارد بي (شبشب) والتالت بيكلم (المعرد برشم) في اللاسلكي احنا في ورطه يا (قايد) لكن (القايد) برشم الزول القال الدبيبات دي حقت ابو منو هسه عرف انها حقت الجيش السوداني حقت الصياد حقت الرجال البيرسموا خط النار بدمهم وعرقهم وصبرهم ما بالكلام الفارغ والصور الملفقه برشم اقترح انسحاب للفوله لكن وين الفوله ذاتا خاشيها الصياد في الجدول الجاي… الجيش الليله كتب صفحه تانيه من كتاب الكرامه وعلم ليك المرتزقة معنى الحرب مش الحرب (الالكترونيه) الحرب الحقيقيه المتحرك البطل ومعاه القوات المشتركه نفذوا هجوم منسق ومحسوب لعبوا الميدان بخريطه وذكاء وتفوقوا على مليشيا الما بتعرف غير الزعيق… الدبيبات يا سادة.. هي مفتاح… بتحريرها.. اتفك الحصار عن الدلنجكادوقلي واتقفل باب الامداد من الفوله واتعزلت بارا شمال الأبيض… يعني المليشيا اتحبست في جزيره نسيها البحر…. والخساير في معركة الدبيبات الليلة حدث ولا حرج جثث في العراء عربات محروقه واجهزه اتصالات شغاله تسجل صيحات الهروب والندم … المواطن… هناك بين نار الحصار ونبض الأمل… فجأه سمع نحن الجيش نحن رجعنا والناس بكت من الفرح مش خوف… لا بكاء النصر لانو الجيش لما يوعد بيوفي ولما يتحرك بيقلب الموازين اما الدعامة المساكين في زول لحدي هسه شايل الكفتيره يمكن قاعد في تحت ضل شجره يراجع في شريط الهجوم ويقول في سره يا ريتني كنت مزارع وما سمعت كلام برشم…. خلاصه الكلام الجيش السوداني رجع الدبيبات ولسه المشوار قدام لانو الصياد ما بيصطاد مره ويمشي.. الصياد بيراقب ويصطاد ويخلي الحكايه عنوان لزمن جديد
جاكم الصياد ولسه…….
